ភ្នំពេញ៖ ក្រសួងទេសចរណ៍ បានប្រាប់ដល់មន្ទីរទេសចរណ៍ សហការជាមួយមន្ទីរធម្មការ និងសាសនារាជធានី-ខេត្ត រៀបចំ «វត្តទេសចរណ៍គំរូ» ដើម្បីទាក់ទាញភ្ញៀវទេសចរឱ្យឈ្វេងយល់ពីប្រវត្តិនិងទំនៀមទម្លាប់នៃការរៀបចំពិធីបុណ្យចូលឆ្នាំប្រពៃណីជាតិ ខណៈបច្ចុប្បន្នកម្ពុជាមានវត្តសរុបចំនួន ៥ ១៣៣វត្ត។

ក្នុងសារាចរណែនាំរបស់ក្រសួងទេសចរណ៍ដែលចុះនៅថ្ងៃទី២០ ខែមីនា ឆ្នាំ២០២៣ ក្រសួងបានប្រាប់ដល់មន្ទីរទេសចរណ៍ និងមន្ទីរធម្មការដូច្នេះថា៖ «ត្រូវសហការគ្នា រៀបចំវត្តទេសចរណ៍គំរូសម្រាប់ភ្ញៀវទេសចរអន្តរជាតិ អាចស្វែងយល់ពីប្រវត្តិ និងទំនៀមទម្លាប់នៃការរៀបចំពិធីបុណ្យចូលឆ្នាំប្រពៃណីជាតិ»។

ក្នុងសារាចរណែនាំដដែល ក៏បានប្រាប់ឱ្យមន្ទីរទេសចរណ៍ ត្រូវសហការជាមួយមន្ទីរវប្បធម៌ និងវិចិត្រសិល្បៈ និងមន្ទីរអប់រំ យុវជន និងកីឡា បំផុសចលនាឱ្យមានការប្រឡងចម្រៀងបូរាណ សម័យ កំណាព្យ អាយ៉ៃ ចាប៉ី និងការលេងល្បែងប្រជាប្រិយ នៅក្នុង មូលដ្ឋានរបស់ខ្លួន និងត្រូវជួយសម្រួលឱ្យមានការសម្តែងរបាំត្រុដិនៅតាមគោលដៅសំខាន់ៗ ដូចជា សណ្ឋាគារ ផ្ទះសំណាក់ ភោជនីយដ្ឋាន កន្លែងកម្សាន្ត និងមូលដ្ឋានអាជីវកម្មនានា។

ទន្ទឹមនឹងខេត្តសៀមរាបមានព្រឹត្តិការណ៍ «អង្គរសង្រ្កាន្ត» ក្រសួងទេសចរណ៍ជំរុញឱ្យរដ្ឋបាលរាជធានី ខេត្ត មន្ទីរជំនាញ និងដៃគូពាក់ព័ន្ឋ រៀបចំឱ្យមានព្រឹត្តិការណ៍សង្ក្រាន្តចូលឆ្នាំ និងកម្មវិធីកម្សាន្ដសប្បាយនានាតាមទំនៀមទម្លាប់ប្រពៃណី។

ជាមួយគ្នានេះ ក្រសួងទេសចរណ៍ក៏ណែនាំឱ្យអាជីករ និងប្រតិបត្តិករទេសចរណ៍ ត្រូវសរសេរតម្លៃសេវាស្នាក់នៅ ម្ហូបអាហារ និងសេវាផ្សេងៗ ឱ្យបានច្បាស់លាស់ដោយសរសេរជាភាសាខ្មែរនៅខាងលើ និងភាសាបរទេសនៅខាងក្រោម ដើម្បីជៀសវាងមានការប្រតិកម្មពីអតិថិជន។ ក្រសួងព្រមានថា បើមិនអនុវត្តតាមតារាងដែលបានបិទផ្សាយ ម្ចាស់មូលដ្ឋានអាជីវកម្ម ត្រូវទទួលខុសត្រូវចំពោះមុខច្បាប់ជាធរមាន។

ទាក់ទងនឹងផ្នែកបរិស្ថានវិញ ក្រសួងទេសចរណ៍ក៏បានប្រាប់ស្ថាប័នពាក់ព័ន្ធត្រូវអប់រំដល់ម្ចាស់អាជីវកម្មទេសចរណ៍ និងភ្ញៀវទេសចរលុបបំបាត់ការបោះសំរាម និងកាកសំណល់ផ្សេងៗចោលក្រៅធុង ឬក្រៅកន្ត្រកសំរាម៕